रावेर-लाईव्ह ट्रेंड्स न्यूज प्रतिनिधी ।रावेर शहरात पुण्यश्लोक अहिल्यादेवी होळकर यांची जयंती अतिशय उत्साहात, अभिमानाने आणि सांस्कृतिक रंगात साजरी करण्यात आली. या प्रसंगी धनगर समाजाच्या युवा नेते संदीप सावळे यांच्या नेतृत्वात सुमारे तिनशे दुचाकीस्वार युवकांनी शहरातून भव्य रॅली काढली. संपूर्ण शहरात उत्सवाचे वातावरण पसरले होते, आणि अनेक ठिकाणी सामाजिक व सांस्कृतिक उपक्रमांनी नागरिकांना ऐतिहासिक आठवणींशी जोडून ठेवले.
या जयंती सोहळ्याचे आयोजन मंत्री गिरीश महाजन यांच्या मार्गदर्शनाखाली झाले असून, रावेर ग्रामीण रुग्णालयापासून रॅलीस प्रारंभ करण्यात आला. पुण्यश्लोक अहिल्यादेवी होळकर यांच्या प्रतिमेस पुष्पहार अर्पण करून रॅलीला शुभारंभ झाला. त्यानंतर डॉ. बाबासाहेब आंबेडकर गांधी चौक, महालक्ष्मी मंदिर मार्ग, आणि शहरातील मुख्य रस्त्यांवरून ही रॅली मार्गक्रमण करत माजी सैनिक सभागृहात समारोपाला पोहोचली. संपूर्ण रॅलीदरम्यान युवकांचा जोश आणि समाजाबद्दलचा अभिमान स्पष्टपणे दिसून येत होता.
समारोप कार्यक्रमात रावेरचे आमदार अमोल जावळे यांनी विशेष उपस्थिती लावून आपले मनोगत व्यक्त केले. “धनगर समाजाच्या न्याय्य मागण्या आणि प्रश्नांबाबत राज्य सरकार सकारात्मक असून, त्याच्या निराकरणासाठी कटिबद्ध आहे,” असे स्पष्ट आश्वासन त्यांनी दिले.
कार्यक्रमासाठी भाजपा जिल्हा उपाध्यक्ष पद्माकर महाजन, बाजार समितीचे सदस्य जयेश कुवटे, भाजपा माजी तालुकाध्यक्ष राजन लासुरकर, तसेच हरलाल कोळी, नारायण पाचपोळे, विश्वजीत सावळे, दीपक सावळे, मुकेश कावडकर, दिगंबर बोरसे, राजू पाचपोळे, नितीन बोरसे यांच्यासह तालुक्यातील शेकडो युवकांनी सहभाग नोंदवला.
युवा नेते संदीप सावळे यांनी आपल्या भाषणात समाजाच्या न्यायहक्कासाठी सातत्याने संघर्ष करण्याची भूमिका मांडली. “धनगर समाजाच्या प्रश्नांसाठी माझा लढा भविष्यातही थांबणार नाही. आ. अमोल जावळे यांच्या सहकार्याने आपल्या समाजासाठी अधिक ठोस भूमिका घेण्याचा निर्धार मी आज घेतो आहे,” असे ठाम शब्दांत त्यांनी सांगितले.
