भुसावळ लाईव्ह ट्रेंडस न्यूज प्रतिनिधी । भुसावळ तालुक्यातील नागरिकांसाठी आता शिधापत्रिका (रेशन कार्ड) संदर्भातील विविध सेवा ऑनलाईन उपलब्ध करून देण्यात आल्या आहेत. नागरिकांनी घरबसल्या या सुविधांचा लाभ घ्यावा, असे आवाहन प्रशासनाने केले आहे. यामुळे नागरिकांचा वेळ आणि श्रम वाचणार आहेत.
कोणत्या सेवा ऑनलाईन उपलब्ध आहेत?
नवीन शिधापत्रिकेसाठी अर्ज करणे, दुय्यम शिधापत्रिका मिळवणे, तसेच शिधापत्रिकेमध्ये नाव समाविष्ट करणे किंवा कमी करणे यांसारख्या सेवा आता ऑनलाईन उपलब्ध आहेत. या सेवांचा लाभ घेण्यासाठी नागरिकांना शासनाच्या www.mahafood.gov.in या संकेतस्थळावर ‘RCMS Maharashtra Public Login’ या लिंकद्वारे प्रवेश करता येईल.
मार्गदर्शनपर माहिती उपलब्ध, अधिक वापराचे आवाहन
ऑनलाईन प्रक्रियेत नागरिकांना येणाऱ्या अडचणी टाळण्यासाठी https://mahafood.gov.in/services/ या लिंकवर सविस्तर मार्गदर्शनपर माहिती उपलब्ध करून देण्यात आली आहे. त्यामुळे आता कोणत्याही शासकीय कार्यालयात न जाता नागरिक सहजपणे शिधापत्रिकेशी संबंधित सेवा ऑनलाईन पद्धतीने मिळवू शकतील. शिधापत्रिकेसारख्या आवश्यक सेवाही इतर शासकीय दाखल्यांप्रमाणेच ऑनलाईन उपलब्ध झाल्यामुळे, प्रशासनाने नागरिकांना पब्लिक लॉगिनचा अधिकाधिक वापर करण्याचे आवाहन केले आहे. अधिक माहितीसाठी संबंधित QR कोड स्कॅन करून तपशील पाहता येईल.
