सावदा-लाईव्ह ट्रेंडस न्यूज प्रतिनिधी । रावेर तालुक्यातील तासखेडा गावात आज शुक्रवारी १३ जून सकाळी सहा वाजण्याच्या सुमारास एका अत्यंत दुर्दैवी घटनेने संपूर्ण परिसरात शोककळा पसरली आहे. विजेचा धक्का लागून १० वर्षीय मुलीचा, मानवी समाधान कोळीचा मृत्यू झाला. तिला वाचवण्यासाठी धावलेल्या वडील समाधान अशोक कोळी (वय ३६) यांचाही विजेच्या तीव्र धक्क्याने जागीच मृत्यू झाला.
चिमुकलीला वाचवताना पित्याचाही अंत
या हृदयद्रावक घटनेने कोळी कुटुंबावर दुःखाचा डोंगर कोसळला आहे. गावात एकच हंबरडा फुटला असून, एकाच कुटुंबातील दोन जीव एकाच वेळी अचानक हरपल्याने ग्रामस्थांनी तीव्र हळहळ व्यक्त केली आहे. ही घटना घडताच स्थानिक प्रशासन आणि पोलिसांनी तात्काळ घटनास्थळी धाव घेतली. घटनेचा पंचनामा करून पुढील तपास सुरू करण्यात आला आहे.
विजेच्या सुरक्षित वापराबाबत जनजागृतीची गरज
या दुर्दैवी घटनेमुळे विजेच्या सुरक्षित वापराबाबत जनजागृती होणे किती महत्त्वाचे आहे, हे पुन्हा एकदा अधोरेखित झाले आहे. अशा घटना टाळण्यासाठी योग्य ती खबरदारी घेणे आणि विद्युत उपकरणांची नियमित तपासणी करणे आवश्यक असल्याचे मत नागरिक व्यक्त करत आहेत. तासखेडा गावावर शोककळा पसरली असून, कोळी कुटुंबाला आधार देण्यासाठी ग्रामस्थ पुढे येत आहेत.
