जळगाव लाईव्ह ट्रेंडस न्यूज प्रतिनिधी । राज्य शासनाच्या ‘शाळा प्रवेशोत्सव २०२५-२६’ उपक्रमांतर्गत आज जळगाव जिल्ह्यातील १८६० जिल्हा परिषद, महानगरपालिका आणि नगर परिषद शाळांमध्ये नवीन शैक्षणिक वर्षाचा उत्साहात प्रारंभ झाला. सर्व शाळांमध्ये नव्याने प्रवेश घेतलेल्या विद्यार्थ्यांचे औक्षण, पुष्पगुच्छ देऊन आणि टाळ्यांच्या गजरात जल्लोषात स्वागत करण्यात आले. या उपक्रमात खा. स्मिता वाघ, आ. प्रा. चंद्रकांत सोनवणे, आ. अमोल चिमणराव पाटील, जिल्हाधिकारी आयुष प्रसाद, जिल्हा परिषदेच्या मुख्य कार्यकारी अधिकारी मीनल करनवाल यांच्यासह विविध विभागांचे अधिकारी, शिक्षक, पालक व शाळा व्यवस्थापन समिती सदस्यांनी सहभाग नोंदवत वातावरण आनंदमय केले.
मान्यवरांच्या उपस्थितीने प्रवेशोत्सवाला बळकटी
जिल्ह्यातील विविध ठिकाणी मान्यवरांनी शाळांना भेटी देऊन विद्यार्थ्यांचा उत्साह वाढवला. अमळनेर तालुक्यातील जवखेडे येथील जिल्हा परिषद प्राथमिक शाळेत खासदार स्मिता वाघ यांच्या हस्ते विद्यार्थ्यांचे स्वागत झाले, जिथे गणवेश, शालेय साहित्य वाटपाबरोबरच वृक्षारोपण करून पर्यावरण संवर्धनाचा संदेश देण्यात आला. चोपड्याचे आमदार चंद्रकांत सोनवणे यांच्या उपस्थितीत अडावद कन्या व अडावद मुले शाळांमध्ये, तर पारोळा तालुक्यातील कन्हेरे शाळेत आमदार अमोल चिमणराव पाटील यांच्या हस्ते विद्यार्थ्यांचे स्वागत करून गणवेश व पाठ्यपुस्तके देण्यात आली.
अधिकारी वर्गाचा सक्रिय सहभाग
जिल्हा प्रशासनानेही या प्रवेशोत्सवात सक्रिय सहभाग नोंदवला. जिल्हाधिकारी आयुष प्रसाद यांनी जामनेर तालुक्यातील भराडी शाळेला भेट देऊन विद्यार्थ्यांना गणवेश व पाठ्यपुस्तके वितरित केली. मुख्य कार्यकारी अधिकारी मीनल करनवाल यांनी नांद्राबु. व पिलखेडे शाळांमध्ये गुलाबपुष्पांनी स्वागत करून पाठ्यपुस्तके वाटप केले. विशेष म्हणजे, पिलखेड येथे “ग्रंथ दिंडी” चे आयोजनही करण्यात आले होते. याशिवाय, भुसावळ येथे तहसीलदार नीता लबडे, निवासी उपजिल्हाधिकारी गजेंद्र पाटोळे (शिरसोली), सहायक आयुक्त जनार्दन पवार (वडगाव लांबे, चाळीसगाव), मुख्याधिकारी भूषण वर्मा (सावदा) सह अनेक अधिकारी विविध शाळांमध्ये उपस्थित राहिले.
ग्रामीण शिक्षणात नवचैतन्य आणि प्रेरणा
जिल्हा अधीक्षक कृषी अधिकारी कुर्बान तडवी (उर्दू शाळा, चोपडा), उपमुख्य कार्यकारी अधिकारी स्नेहा पवार (जिराळी), जिल्हा माहिती अधिकारी युवराज पाटील (विदगाव, ता. जळगाव), नायब तहसीलदार रवींद्र उगले (महिंदळे), मुख्याधिकारी रवींद्र लांडे (गिरड), निवासी नायब तहसीलदार सुधीर सोनवणे (भडगाव शाळा क्र. २), जिल्हा क्रीडा अधिकारी रवींद्र नाईक (गारखेडे खु.), आणि तहसीलदार विजय बनसोड (पाचोरा) यांच्यासह जिल्ह्यातील अनेक अधिकाऱ्यांनी विविध शाळांना उपस्थिती लावून विद्यार्थ्यांचे स्वागत केले आणि त्यांना शिक्षणासाठी प्रेरणा दिली. या शाळा भेटींमुळे ग्रामीण भागात नवचैतन्य निर्माण झाले असून, गुणवत्तापूर्ण शिक्षणाबद्दल विद्यार्थ्यांमध्ये आत्मविश्वास आणि शाळेविषयी आकर्षण निर्माण झाले आहे.
