जळगाव-लाईव्ह ट्रेंडस न्यूज प्रतिनिधी । महाराष्ट्रात मोटार वाहन अधिनियम १९८८ चे कलम ७५ आणि रेंट-ए-मोटार सायकल स्कीम, १९९७ अंतर्गत मोटारसायकल भाड्याने देण्यासाठी परवाने देण्याची तरतूद होती. मात्र, १२ एप्रिल २०१६ रोजीच्या शासनाच्या निर्देशानुसार, या स्कीम अंतर्गत परवाने देण्यावर निर्बंध घालण्यात आले होते. यामुळे भाडेतत्त्वावरील मोटारसायकल व्यवसायावर परिणाम झाला होता.
नवीन आदेशाने परवान्यांना पुन्हा परवानगी
आता नवीन निर्णयानुसार, शासनाने २८ एप्रिल २०२५ रोजीच्या आदेशाने पूर्वी लागू करण्यात आलेले निर्बंध रद्द केले आहेत. त्यामुळे, महाराष्ट्रात रेंट-ए-मोटार सायकल स्कीम, १९९७ अंतर्गत मोटारसायकल भाड्याने देण्यासाठी पुन्हा परवाने देण्यास परवानगी देण्यात आली आहे. यामुळे पर्यटन आणि स्थानिक वाहतूक सुलभ होण्यास मदत होईल. सहायक प्रादेशिक परिवहन अधिकारी प्रवीण बागडे यांनी प्रसिद्धीपत्रकाद्वारे ही माहिती दिली आहे.
