जळगाव- लाईव्ह ट्रेंड्स न्यूज प्रतिनिधी । दीपनगर औष्णिक विद्युत केंद्रातून राख वाहून नेणाऱ्या बल्कर वाहनांमुळे सुरत-नागपूर राष्ट्रीय महामार्गावर कोंडी होत असल्याने येथे बल्कर वाहने उभे करू नयेत असे निर्देश आज मंत्री ना. संजय सावकारे यांनी जळगाव येथील बैठकीत दिलेत.
दीपनगर औष्णिक विद्युत केंद्रातून राख वाहून नेणाऱ्या बल्कर वाहनांमुळे सुरत-नागपूर राष्ट्रीय महामार्गाच्या सर्व्हिस रोडवर निर्माण होणाऱ्या वाहतूक कोंडी आणि रस्ता सुरक्षेच्या प्रश्नावर आज जिल्हाधिकारी कार्यालयात बैठक आयोजित करण्यात आली. या बैठकीच्या अध्यक्षस्थानी महाराष्ट्र राज्याचे वस्त्रोद्योग मंत्री ना. संजय सावकारे होते.
बैठकीत बल्कर वाहनांच्या अव्यवस्थित उभ्या राहण्यामुळे होणारी वाहतूक कोंडी, नागरिकांना होणारा त्रास, तसेच संभाव्य अपघातांच्या पार्श्वभूमीवर चर्चा होऊन विविध उपाययोजनांचा निर्णय घेण्यात आला. यात सर्व्हिस रोडवर बल्कर उभे करण्यास बंदी घालण्यात आली आहे. तसेच राख वाहतुकीसाठी नियोजित वेळापत्रक तयार करणे, वाहतूक पोलिस व प्रकल्प सुरक्षा यांच्यात समन्वय राखणे आणि अपघात टाळण्यासाठी CCTV, संकेतचिन्हे आणि सुरक्षारक्षकांची नेमणूक करणे हे निर्णय घेण्यात आलेत.
वस्रोद्योग मंत्री श्री. संजय सावकारे यांनी स्पष्ट शब्दांत सांगितले की, “रस्ता सुरक्षा आणि नागरिकांचा जीव वाचवणे हे प्राधान्याचं आहे. त्यामुळे सर्व संबंधित विभागांनी यावर गंभीरपणे काम करावे.” बैठकीस जिल्हाधिकारी, पोलीस अधिकारी, राष्ट्रीय महामार्ग प्राधिकरणाचे प्रतिनिधी, परिवहन विभागाचे अधिकारी आणि औष्णिक प्रकल्पाचे सुरक्षा अधिकारी उपस्थित होते.
