अमळनेर लाईव्ह ट्रेंडस न्यूज प्रतिनिधी । अमळनेर तालुक्यातील पिंगळवाडे येथे १३ जून रोजी सायंकाळी ४:३० वाजण्याच्या सुमारास पाण्याची मोटर सुरू करताना विजेचा जोरदार शॉक लागून २८ वर्षीय तरुणाचा दुर्दैवी मृत्यू झाल्याची घटना घडली आहे. या घटनेने परिसरात हळहळ व्यक्त होत आहे. याबाबत शनीवारी १४ जून रोजी मध्यरात्री १२.३० वाजता मारवड पोलीसात अकस्मात मृत्यूची नोंद करण्यात आली आहे. सचिन मनोहर पाटील (वय २८) रा. पिंगळवाडे ता. अमळनेर असे मयत तरूणाचे नाव आहे.
अमळनेर तालुक्यातील पिंगळवाडे येथील सचिन मनोहर पाटील हा तरुण शुक्रवारी १३ जून रोजी सायंकाळी ४:३० वाजेच्या सुमारास नळाला पाणी आल्याने आपल्या नवीन घराच्या बांधकामावर पाणी मारण्यासाठी इलेक्ट्रिक मोटर सुरू करण्यासाठी गेला होता. मोटर सुरू करताच त्याला अचानक विजेचा जोरदार धक्का बसला आणि तो फेकला गेला. शेजारी राहणाऱ्या ग्रामस्थांनी घटनास्थळी धाव घेवून विद्यूत पुरवठा बंद केला. त्याला तातडीने अमळनेर ग्रामीण रुग्णालयात दाखल केले. मात्र, डॉक्टरांनी तपासणी करून त्याला मृत घोषित केले. याबाबत मारवड पोलिसांत अकस्मात मृत्यूची नोंद करण्यात आली आहे. या प्रकरणाचा पुढील तपास पोलीस कर्मचारी सुनील पाटील हे करत आहेत.
