रावेर-लाईव्ह ट्रेंडस न्यूज प्रतिनिधी । रावेर तालुक्यातील खानापूर मंडळात महसूल विभागाच्या वतीने ‘छत्रपती शिवाजी महाराज महसूल समाधान शिबिरा’चे यशस्वी आयोजन करण्यात आले. तहसीलदार बंडू कापसे यांच्या नेतृत्वाखाली पार पडलेल्या या शिबिरात एकूण ६४० नागरिकांना विविध शासकीय सेवा आणि योजनांचा थेट लाभ मिळाला.
या शिबिराला नागरिकांनी उत्स्फूर्त प्रतिसाद दिला. वय, अधिवास आणि रहिवास दाखले, जात प्रमाणपत्रे, उत्पन्न दाखले यासह इतर महत्त्वाच्या कागदपत्रांसाठी नागरिकांनी मोठ्या संख्येने सहभाग घेतला. शिबिरात सर्वाधिक १६८ जणांना वय, अधिवास व रहिवास दाखले देण्यात आले. याशिवाय, जात प्रमाणपत्रासाठी ८७ आणि उत्पन्न दाखल्यासाठी ७८ नागरिकांनी लाभ घेतला.
विविध विभागांनी शिबिरात सहभाग घेऊन नागरिकांना सेवा पुरवल्या. संजय गांधी योजना DBT प्रक्रियेअंतर्गत ८९ लाभार्थ्यांची कामे करण्यात आली. कृषी विभागाच्या अंतर्गत ८२ नागरिकांनी सेवा घेतली. तसेच, आरोग्य विभागाकडून २८, भूमी अभिलेख कार्यालयातून २७, पुरवठा विभागाकडून ६६ आणि MGNREGA जॉब कार्ड १२ नागरिकांना वितरित करण्यात आले. घरकुल विभाग पंचायत समिती रावेरकडून ३ जणांना लाभ मिळाला.
या शिबिरामुळे नागरिकांच्या शासकीय कागदपत्रांच्या प्रक्रियेला गती मिळाली असून, त्यांना एकाच ठिकाणी सर्व आवश्यक सेवा मिळाल्याने त्यांचा वेळ आणि पैसा वाचला. नागरिकांनी या उपक्रमाबद्दल समाधान व्यक्त केले आहे. शासनाच्या योजना आणि सेवा थेट गावपातळीवर उपलब्ध करून देण्याचा हा प्रयत्न यशस्वी ठरला असल्याचे दिसून येते.
