रावेर-लाईव्ह ट्रेंडस न्यूज प्रतिनिधी । रावेर येथे एसटी बसमधून महिलांच्या पर्स लांबवणाऱ्या एका महिलेला रावेर पोलिसांनी अवघ्या २४ तासांत अटक केली आहे. तिच्याकडून चोरीस गेलेले सोने-चांदीचे दागिने आणि मोबाईलसह ५० हजार रुपयांचा मुद्देमाल जप्त करण्यात आला आहे. यामुळे प्रवाशांना दिलासा मिळाला आहे.
प्रवासात घडली पर्स चोरीची घटना
रावेर येथील गांधी चौकातील नरेंद्र हरी तायडे यांची बहीण ९ जून रोजी पिंपरी-नांदू येथून मुक्ताईनगर ते रावेर बसमध्ये प्रवास करत होती. रावेर बसस्थानकात पोहोचल्यावर त्यांना त्यांची पर्स जागेवर नसल्याचे लक्षात आले. पर्स चोरीस गेल्याचे निदर्शनास येताच त्यांनी तत्काळ पोलिसांना माहिती दिली. चोरीस गेलेल्या पर्समध्ये ४० हजार रुपये किमतीची ५ ग्रॅम वजनाची सोन्याची चेन, सोन्याचे गोल मणी व मंगळसूत्र, २ हजार रुपये किमतीचे चांदीचे जोडवे आणि ८ हजार रुपये किमतीचा मोबाईल फोन असा एकूण ५० हजार रुपयांचा ऐवज होता. या संदर्भात गुन्हा दाखल करण्यात आला होता.
सीसीटीव्ही फुटेज आणि गुप्त माहितीने मिळाली यश
या गुन्ह्याच्या तपासात रावेर गुन्हे शोध पथकाने मोठी तत्परता दाखवली. मुक्ताईनगर ते रावेर या संपूर्ण रस्त्यावरील सीसीटीव्ही फुटेजची कसून तपासणी करण्यात आली. तसेच, सदर महिलेबाबत गुप्त बातमीदारांद्वारे माहिती गोळा करण्याचे काम सुरू केले. अथक प्रयत्नांनंतर, तांत्रिक विश्लेषणाद्वारे आणि सबळ पुराव्यानिशी या महिलेला निष्पन्न करण्यात आले.
आरोपी महिलेची कबुली आणि मुद्देमाल जप्त
संशयित आरोपी महिलेची गुन्ह्यासंबंधी अधिक चौकशी केली असता, तिने गुन्ह्याची कबुली दिली. पोलिसांनी तिच्या राहत्या घरातून पंचांसमक्ष गुन्ह्यातील मुद्देमाल जप्त केला आणि तिला अटक केली. या महिलेस येथील न्यायालयात हजर केले असता, तिला १४ दिवसांची न्यायालयीन कोठडी सुनावण्यात आली असून, तिची जळगाव कारागृहात रवानगी करण्यात आली आहे.
पोलिस दलाचे कौतुकास्पद कार्य
सदरची ही यशस्वी कार्यवाही पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, पोलीस उपअधीक्षक पिंगळे यांच्या मार्गदर्शनाने पार पडली. यात पोलीस ठाण्याचे पोलीस निरीक्षक डॉ. विशाल जयस्वाल, सहायक पोलीस निरीक्षक मीरा देशमुख यांच्यासह गुन्हे शोध पथकातील पो. ना. कल्पेश आमोदकर, पो. शि. सविन घुगे, प्रमोद पाटील, श्रीकांत चव्हाण, विशाल पाटील, महेश मोगरे, संभाजी बिजागरे यांनी विशेष परिश्रम घेतले. गुन्ह्याचा पुढील तपास सपोनि. मीरा देशमुख करीत आहेत.
