अमळनेर – लाईव्ह ट्रेंड्स न्यूज प्रतिनिधी । महाराष्ट्र राज्य पत्रकार संघाच्या डिजीटल मिडिया प्रदेशाध्यक्ष सिद्धार्थ भोकरे यांना जीवे मारण्याची धमकी दिल्याच्या प्रकरणाने राज्यभरात खळबळ उडाली असून, अमळनेर शाखेतर्फे यास तीव्र शब्दांत निषेध व्यक्त करण्यात आला आहे. या पार्श्वभूमीवर संघाच्या प्रतिनिधींनी पोलीस उपअधीक्षक व पोलीस निरीक्षक यांना निवेदन सादर करून तत्काळ कारवाईची मागणी केली आहे.
सिद्धार्थ भोकरे यांनी दैनिक जनप्रवास या वृत्तपत्रामार्फत पाकिस्तानातील क्रिकेटपटूंप्रमाणेच भारतातील बॉलीवूडमधील खान बंधूंनी देखील भारतप्रेमाचे प्रदर्शन करावे, असे मत व्यक्त केले होते. त्यांच्या या लेखानंतर अज्ञात इसमांकडून निनावी पत्राद्वारे त्यांना धमकी देण्यात आली. “आठ दिवसांत माफी माग, अन्यथा तुला गोळीबार करून उडवून देऊ,” अशा आशयाच्या धमकीमुळे राज्यातील पत्रकार संघटनांमध्ये संतापाची लाट उसळली आहे.
या प्रकाराचा महाराष्ट्र राज्य पत्रकार संघाने निषेध करताना राज्य सरकारने तत्काळ या प्रकरणाची गंभीर दखल घेऊन भोकरे यांना पोलिस संरक्षण देण्याची मागणी केली आहे. तसेच धमकी देणाऱ्या व्यक्तींना त्वरीत अटक करून कठोर कारवाई करण्यात यावी, असेही निवेदनात नमूद करण्यात आले आहे.
अमळनेर येथे याप्रकरणी पोलीस प्रशासनाला दिलेल्या निवेदनावेळी महाराष्ट्र राज्य पत्रकार संघाच्या इलेक्ट्रॉनिक मीडिया विभागाचे विभागीय अध्यक्ष तथा अमळनेर तालुकाध्यक्ष समाधान मैराळे, जिल्हा सरचिटणीस सुरेश कांबळे, जिल्हा उपाध्यक्ष यदुविर पाटील, उपाध्यक्ष प्रवीण बैसाणे, नूर खान, सुरेंद्र जैन, संघटक आत्माराम अहिरे, तालुका प्रसिद्धी प्रमुख गणेश चौहान यांची उपस्थिती होती.
या निवेदनाद्वारे संघाने पोलिस प्रशासनाकडे निवेदनाची तातडीने दखल घेऊन योग्य ती कार्यवाही करण्यात यावी, अशी विनंती केली आहे. या प्रकारामुळे पत्रकारांच्या सुरक्षिततेचा प्रश्न पुन्हा एकदा ऐरणीवर आला आहे.
