अमळनेर लाईव्ह ट्रेंडस न्यूज प्रतिनिधी। अमळनेर तालुक्यातील कळमसरे येथील ग्रामपंचायत कळमसरे येथे सन २०२५-२६ या वर्षाचा पुण्यश्लोक अहिल्याबाई होळकर पुरस्कार गावातील सामाजिक कार्यात नेहमी अग्रेसर असणाऱ्या दोन महिलांना प्रदान करण्यात आला. विजया सुधाकर नेमाडे आणि नीलिमा संजय महाजन या दोन्ही महिलांना अहिल्याबाई होळकर जयंतीनिमित्त ग्रामपंचायत कार्यालयात हा पुरस्कार देऊन गौरवण्यात आले.
यावेळी सरपंच जगदीश निकम, उपसरपंच जितेंद्रसिंग पाटील, ग्रामपंचायत सदस्य प्रमिला चौधरी तसेच ग्रामपंचायत अधिकारी ज्ञानेश्वर पाटील यांच्या हस्ते सन्मानचिन्ह, सन्मानपत्र, शाल, श्रीफळ आणि रोख पाचशे रुपये असे पुरस्काराचे स्वरूप होते.
शासनाच्या आदेशानुसार दरवर्षी ग्रामपंचायत कळमसरेच्या वतीने पुण्यश्लोक अहिल्याबाई होळकर पुरस्कार गावातील सामाजिक कार्यात उत्कृष्ट योगदान देणाऱ्या महिलांना दिला जातो. यावर्षी आरोग्य सेवेत सक्रिय असणाऱ्या विजया नेमाडे आणि बचत गटांच्या माध्यमातून महिला सक्षमीकरणासाठी कार्य करणाऱ्या नीलिमा महाजन यांना त्यांच्या उल्लेखनीय कार्याबद्दल हा पुरस्कार प्रदान करण्यात आला. या समारंभाला अंगणवाडी सेविका, मदतनीस, आशा सेविका आणि सर्व सन्माननीय ग्रामपंचायत सदस्य उपस्थित होते.
