यावल-लाईव्ह ट्रेंडस न्यूज प्रतिनिधी । यावल तालुक्यातील सर्व जिल्हा परिषद आणि खाजगी अनुदानित व विनाअनुदानित शाळांमध्ये उद्या, १६ जून रोजी ‘शाळा प्रवेशोत्सव’ मोठ्या उत्साहात साजरा केला जाणार आहे. जिल्हा परिषद शाळांची विद्यार्थी पटसंख्या वाढावी, त्यांचे महत्त्व जनतेपर्यंत पोहोचावे, विद्यार्थ्यांसाठीच्या सर्व योजनांची माहिती व्हावी आणि मोफत व सक्तीच्या शिक्षणाचे महत्त्व गावकर्‍यांना समजावे, या उद्देशाने या उत्सवाचे आयोजन करण्यात आले आहे. यासाठी तालुक्यातील सर्व शाळांनी जय्यत तयारी केली आहे.
नवागत विद्यार्थ्यांचे पारंपरिक पद्धतीने स्वागत
शाळा प्रवेशोत्सवाच्या पहिल्याच दिवशी, इयत्ता पहिलीमध्ये दाखल झालेल्या सर्व पात्र मुलांचे सकाळी बैलगाडी, ट्रॅक्टर, घोडागाडी आणि इतर पारंपरिक वाहनांवरून मिरवणूक/प्रभात फेरी काढली जाईल. त्यानंतर शाळेत पोहोचल्यावर केंद्रीय राज्यमंत्री खा. रक्षाताई खडसे, रावेर-यावल मतदारसंघाचे आमदार अमोल जावळे, चोपडा आमदार प्रा. चंद्रकांत सोनवणे आणि इतर सर्व पदाधिकारी, तसेच जिल्हास्तरीय व तालुकास्तरीय सर्व अधिकारी यांच्या वतीने गुलाबपुष्प देऊन नवागत बालकांचे स्वागत केले जाईल.
शाळांमध्ये आकर्षक सजावट आणि सुविधा वाटप
सर्व शाळांच्या दर्शनी भागात / प्रवेशद्वाराजवळ सन्माननीय पदाधिकारी व अधिकारी यांच्या स्वागतासाठी आकर्षक बॅनर लावले जाणार आहेत. तसेच, प्रवेशद्वाराजवळ सुंदर रांगोळी काढून पानाफुलांनी सजावट केली जाईल, ज्यामुळे शाळेत उत्साहाचे वातावरण निर्माण होईल. त्यानंतर, सर्व उपस्थित विद्यार्थ्यांना मोफत पाठ्यपुस्तके, मोफत गणवेश, बूट आणि मोजे यांचे वाटप केले जाईल. शालेय पोषण आहारासोबत गोड अन्नपदार्थ सुद्धा विद्यार्थ्यांना देण्यात येणार आहेत.
मान्यवरांचे मार्गदर्शन आणि मुख्यमंत्री-उपमुख्यमंत्र्यांचे आवाहन
कार्यक्रमाच्या शेवटी, सन्माननीय पदाधिकारी आणि अधिकारी सर्व मुख्याध्यापक, शिक्षक व विद्यार्थ्यांना मार्गदर्शन करतील, त्यानंतर कार्यक्रमाची सांगता होईल. यावल तालुका शिक्षण विभागाने तालुक्यातील सर्व शाळांना पालकांना त्यांच्या पाल्यांना उद्या शाळेच्या पहिल्या दिवशी शाळेत उपस्थित राहण्याबाबत आवाहन करणारी पत्रे दिली आहेत. या पत्रांमध्ये राज्याचे मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे, शिक्षणमंत्री दादा भुसे, शिक्षण सचिव, शिक्षण संचालक, जिल्हाधिकारी आयुष प्रसाद, मुख्य कार्यकारी अधिकारी मिनल करनवाल यांचे आवाहन समाविष्ट आहे.
उपस्थितीचे आवाहन
या शिक्षण प्रवेशोत्सवासाठी तालुक्यातील सर्व पदाधिकारी, अधिकारी वर्ग, सर्व पंचायत समिती विभाग प्रमुख, गावातील सर्व शिक्षणप्रेमी नागरिक, सर्व पालक आणि विद्यार्थ्यांनी उद्या सकाळी आठ वाजता शाळेत उपस्थित राहून विद्यार्थी, शिक्षक व पालकांचा आनंद द्विगुणीत करावा, असे आवाहन पंचायत समिती यावल शिक्षण विभागाचे गटशिक्षण अधिकारी विश्वनाथ धनके यांनी केले आहे. या उत्सवामुळे जिल्हा परिषद शाळांबद्दल सकारात्मक दृष्टिकोन वाढण्यास मदत होईल अशी अपेक्षा आहे.
