जळगाव-लाईव्ह ट्रेंडस न्यूज प्रतिनिधी । जळगाव स्थानिक गुन्हे शाखेने एका थरारक पाठलागानंतर दरोडा टाकण्याच्या तयारीत असलेल्या आणि गोवंश चोरी केलेल्या आरोपीला जेरबंद केले. या कारवाईत पोलिसांनी एका आरोपीला ताब्यात घेतले असून, त्याच्याकडून चोरीचा बैल आणि दरोड्यासाठी वापरण्यात येणारी शस्त्रे जप्त करण्यात आली आहेत. पोलीस अधिकारी संदीप पाटील यांच्या नेतृत्वाखालील पथकाने हा यशस्वी ऑपरेशन राबविण्यात आले अशी अशी माहिती पोलीस अधिक्षक महेश्वर रेड्डी यांनी सोमवारी १६ जून रोजी सायंकाळी ५ वाजता आयोजित पत्रकार परिषदेत माहिती दिली.
स्थानिक गुन्हे शाखेचे वरिष्ठ पोलीस निरीक्षक संदीप पाटील यांच्या नेतृत्वाखालील १५ जून रोजी रात्री ११ ते १६ जून रोजी पहाटे ५ वाजेदरम्यान पथक भुसावळ व मुक्ताईनगर उपविभागात गस्त घालत असताना, मुक्ताईनगर पोलीस स्टेशन हद्दीतील कुंड गावात एका इनोव्हा कारमधून चार संशयित व्यक्ती एका घराजवळ दरोड्याच्या तयारीत उतरताना दिसले. पोलिसांची गाडी दिसताच ते पुन्हा इनोव्हामध्ये बसून भरधाव वेगाने डोलारखेडा फाट्यावरून नागपूर महामार्गाकडे पळू लागले.
थरारक पाठलाग आणि पोलिसांवर हल्ला
पोलिसांनी तात्काळ इनोव्हा कारचा पाठलाग सुरू केला. वाहन थांबवण्याचा इशारा देऊनही इनोव्हा थांबली नाही, उलट चालकाने शासकीय वाहनाला कट मारून जीवे ठार मारण्याचा प्रयत्न केला. जळगाव नियंत्रण कक्षाला याची माहिती देऊन मलकापूर, नांदुरा, बुलढाणा, अकोला येथील पोलीस दलांना वाहन थांबवण्याबाबत कळवण्यात आले. १६ जून रोजी पहाटे ३.४० च्या सुमारास अकोला जिल्ह्यातील बाळापूर तालुक्यातील रिधोरा शिवारात, अकोला शहरातील डिव्हिजन गस्तीवरील पोलीस अधिकारी व कर्मचाऱ्यांनी NHAI कार्यालयाजवळ नागपूर-धुळे महामार्गावर ट्रक आडवे लावून नाकाबंदी केली. येथे इनोव्हा कार हळू झाली आणि बंद पडली.
आरोपी जेरबंद, शस्त्रे आणि चोरलेला बैल जप्त
नाकाबंदीदरम्यान इनोव्हा कार बंद पडताच, त्यातील तीन आरोपी व चालक सीटशेजारी बसलेला एक इसम दरवाजे उघडून पळून गेले. मात्र, इनोव्हा कार चालक अरबाज खान फिरोज खान (वय २३, रा. खदान, हैदरपुरा, अकोला) याला पोलिसांनी जागीच ताब्यात घेतले. या झटापटीत स्थानिक गुन्हे शाखा, जळगाव पथकातील पोलीस निरीक्षक संदीप पाटील यांना किरकोळ मुका मार लागला आहे. इनोव्हा कार (एमएच ३१ सीआर ४७२८) ची तपासणी केली असता, त्यात एक काळ्या रंगाचा चोरी केलेला बैल, एक तलवार, एक गुप्ती, एक चाकू, एक लोखंडी रॉड, दोन दोर आणि काही कपडे असे दरोडा टाकण्यासाठी लागणारे साहित्य व हत्यारे मिळून आले. हे सर्व साहित्य जुने शहर पोलीस स्टेशन, अकोला येथे पंचनामा करून जप्त करण्यात आले आहे.
ताब्यात घेतलेल्या अरबाज खान फिरोज खान याच्या चौकशीतून सैय्यद फिरोज उर्फ अनडूल सैय्यद झहीर, अफजल सैय्यद, इम्रान, तन्नू उर्फ तन्वीर आणि अफरोज खान उर्फ अण्प्या या फरार झालेल्या आरोपींची नावे निष्पन्न झाली आहेत. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि उपविभागीय पोलीस अधिकारी कृष्णांत पिंगळे यांच्या मार्गदर्शनाखाली वरिष्ठ पोलीस निरीक्षक संदीप पाटील, पोउपनिरीक्षक अनिल जाधव, पोहेकॉ दर्शन ढाकणे, सफौ रवी नरवाडे, पोहेकॉ सुनील दामोदरे, विजय पाटील, अक्रम शेख, पोना श्रीकृष्ण देशमुख, पोहेकॉ भरत पाटील यांच्यासह जुने शहर पोलीस स्टेशन अकोला येथील पोउपनिरीक्षक रवींद्र करणकर, पोहेकॉ प्रमोद शिंदे आणि पोकॉ स्वप्नील पोधाडे यांनी यशस्वीरीत्या पार पाडली. या कामगिरीबद्दल पोलीस अधीक्षक जळगाव यांनी संपूर्ण पथकाचे अभिनंदन केले आहे.
